Narón, 24 de abril de 2024. O Pazo da Cultura acollerá esta fin de semana unha nova proposta, o espectáculo de danza tradicional “Ceibe”, de Fran Sieira Compañía de Danza, o sábado 27 ás 20:00 horas. As entradas dispoñibles poden adquirirse no despacho de billetes do Pazo ou na web do Padroado da Cultura: www.padroadodecultura.es. “Ceibe” é unha peza de baile e música tradicional que ten unha duración aproximada dunha hora e cuxa temática afonda nos roles de xénero e a nosa tradición. A obra fai reflexionar sobre as categorías de xénero e os seus estereotipos impostos socialmente para establecer distancia coa normalidade e plantexar construír novas formas de entender o corpo e o movemento. Oito bailadoras e bailadores, dirixidos por Sergio R. Suárez, forman o elenco deste espectáculo. O prezo das entradas é de 9,50 euros para o público xeral e de 6,65 para abonados, desempregados e persoas con carné xove ou de estudante (ata 25 anos).